நீங்கள் தேடியது "மர்ம நபர்கள் கைவரிசை"

கோவை:

கோவை பேரூர் போஸ்டல் காலனியை சேர்ந்தவர் ராஜகோபால் (வயது 68). ஓய்வு பெற்ற பி.எஸ்.என்.எல். ஊழியர். நேற்று இவர் வீட்டை பூட்டிவிட்டு குடும்பத்தினருடன் கோவில்பாளையத்தில் உள்ள உறவினர் வீட்டுக்கு சென்றார்.

இன்று காலை வீடு திரும்பியபோது வீட்டின் பூட்டு உடைக்கப்பட்டிருந்தது. அதிர்ச்சியடைந்த அவர் உள்ளே சென்று பார்த்தபோது பீரோவும் உடைக்கப்பட்டிருந்தது. பீரோவை சோதனை செய்தபோது அதில் வைக்கப்பட்டிருந்த 80 பவுன் நகை- ரூ.1 லட்சத்து 40 ஆயிரம் பணம் கொள்ளை போனது தெரியவந்தது.

இது குறித்த அவர் பேரூர் போலீசில் புகார் செய்தார். போலீசார் கைரேகை நிபுணர்களுடன் சம்பவ இடத்துக்கு வந்து சோதனை மற்றும் விசாரணை நடத்தினர். மேலும் இது குறித்து போலீசார் வழக்குப்பதிவு செய்து கொள்ளையர்களை தேடி வருகிறார்கள். 

நாகர்கோவில்:

களியக்காவிளையை அடுத்த மெதுகும்மல் பகுதியைச் சேர்ந்தவர் பழனி. இவரது மனைவி ஸ்ரீஜா ராணி (வயது 32). இவர், சம்பவத்தன்று வீட்டை பூட்டி விட்டு அருகில் உள்ள உறவினர் ஒருவர் திருமண வீட்டிற்கு சென்றிருந்தார். பின்னர் அங்கிருந்து மாலையில் வீடு திரும்பினார். அப்போது வீட்டின் பின்பக்க கதவு பூட்டு உடைக்கப்பட்டு திறந்து கிடந்தது கண்டு அதிர்ச்சி அடைந்தார்.

மேலும் சம்பவம் குறித்து களியக்காவிளை போலீசாருக்கு தகவல் தெரிவித்தார். சம்பவ இடத்திற்கு சப்-இன்ஸ்பெக்டர் மோகன அய்யர் மற்றும் போலீசார் விரைந்து சென்று விசாரணை மேற்கொண்டனர்.

அப்போது கொள்ளையர்கள் வீட்டின் பின்பக்க கதவை உடைத்து உள்ளே சென்ற அவர்கள் அங்கிருந்த பீரோவை உடைத்து அதில் இருந்த 4 பவுன் எடை உள்ள 3 தங்க வளையல்கள் மற்றும் ஒரு பவுன் எடை உள்ள 2 கம்மல்கள், மற்றொரு மேஜையில் இருந்த ரொக்கப்பணம், ரூ.25 ஆயிரம் ஆகியவற்றை கொள்ளையடித்து சென்றிருப்பது தெரிய வந்தது.

தொடர்ந்து கைரேகை நிபுணர்கள் அங்கு வரவழைக்கப்பட்டனர். அவர்கள் பூட்டு உடைக்கப்பட்ட இடம், பீரோ ஆகிய இடங்களில் கொள்ளையர்களின் கைரேகைகளை பதிவு செய்தனர். போலீசார் அந்த பகுதியில் தீவிர சோதனையில் ஈடுபட்டனர்.

சந்தேகப்படும்படியாக சுற்றித்திரிந்த நபர்களை பிடித்து விசாரணை மேற்கொண்டனர். சம்பவம் குறித்து போலீசார் வழக்குப்பதிவு செய்து கொள்ளையர்களை தேடி வருகின்றனர். அந்த பகுதியில் கண்காணிப்பு காமிரா எதுவும் உள்ளதா? எனவும் விசாரணை நடத்தி வருகின்றனர்.

பொன்னேரி:

மீஞ்சூரை அடுத்த நந்தியம் பாக்கத்தை சேர்ந்தவர் ஏஜாஸ் முகைதீன் (வயது 50). தனியார் கம்பெனி ஊழியர். இன்று அதிகாலை 3 மணிக்கு மசூதிக்கு தொழுகைக்கு சென்றார். பின்னர் வீடு திரும்பிய போது கதவு பூட்டு உடைக்கப்பட்டு கதவு திறந்து கிடந்தது. பீரோவில் இருந்த 4 பவுன் நகை. ரூ. 10 ஆயிரம் ரொக்கம், விலை உயர்ந்த 3 செல்போன்கள் திருடுபோனது தெரியவந்தது.

கொள்ளையர்கள் சிம் கார்டை கழற்றி கட்டிலில் வைத்து விட்டு சென்றுள்ளனர். இதுகுறித்து மீஞ்சூர் போலீசார் விசாரித்து வருகிறாகள்.

ஈரோடு:

பவானி அடுத்த சீதபாளையம் மாரியம்மன் கோவில் தெருவை சேர்ந்தவர் தேவராஜ் (வயது 45). விவசாயி. தேவராஜ் நேற்று இரவு காற்றுக்காக வீட்டின் கதவு திறந்து வைத்து குடும்பத்துடன் தூங்கினார்.

இந்த சந்தர்ப்பத்தை பயன்படுத்திய மர்ம நபர் தேவராஜின் வீட்டுக்குள் புகுந்தார். பின்னர் வீட்டில் உள்ள பீரோவில் இருந்த 32 பவுன் நகையை கொள்ளையடித்துச் சென்றார்.

இன்று காலை கண் விழித்து பார்த்த தேவராஜ் பீரோ திறந்து இருப்பதை பார்த்து அதிர்ச்சி அடைந்தார். பின்னர் பீரோவை பார்த்தபோது பீரோவில் இருந்த 32 பவுன் நகை மாயமாகி இருப்பதை கண்டு அதிர்ச்சி அடைந்தார்.

இது குறித்து தேவராஜ் பவானி போலீஸ் நிலையத்திற்கு தகவல் கொடுத்தர். போலீசார் சம்பவ இடத்துக்கு விரைந்து வந்து வீட்டை பார்வையிட்டனர்.

மேலும் இது குறித்து வழக்குப்பதிவு செய்து விசாரணை மேற்கொண்டு வருகின்றனர். இந்த துணிகர கொள்ளை சம்பவம் பவானியில் பரபரப்பை ஏற்படுத்தி உள்ளது.

அறந்தாங்கி:

புதுக்கோட்டை மாவட்டம் அறந்தாங்கியை அடுத்த பட்டுக்கோட்டை சாலையில் எருக்கனகோட்டை பகுதியில் மணிகண்டன் என்பவருக்கு சொந்தமான பெட்ரோல் பங்க் செயல்பட்டு வருகிறது.

இங்கு நேற்று இரவு பணியில் சுவாதிராஜன், அருள், கார்த்தி ஆகியோர் இருந்தனர். நள்ளிரவில் அவர்கள் விற்பனை முடிந்ததும் விளக்குகளை அணைத்து விட்டு பங்க் அருகே உள்ள அறையில் தூங்க சென்றனர்.

இந்த நிலையில் இன்று அதிகாலை சுமார் 4 மணியளவில் மர்ம நபர்கள் சிலர் மோட்டார் சைக்கிளில் பெட் ரோல் பங்கிற்கு வந்தனர். அவர்கள் கையில் இரும்பு பொருட்கள் வைத்திருந்தனர். கண்ணிமைக்கும் நேரத்தில் பங்கின் அலுவலக அறை கண்ணாடிகளை உடைத்தனர்.

அருகில் இருந்த அறையில் தூங்கி கொண்டிருந்த ஊழியர்களுக்கு இது தெரியவில்லை. இதற்கிடையே அந்த மர்ம நபர்கள் அலுவலக அறைக்குள் புகுந்து அங்கு கல்லாவில் இருந்த விற்பனை பணம் ரூ.1½ லட்சம் மற்றும் கம்ப்யூட்டர் சி.பி.யு.வையும் திருடிக்கொண்டு அங்கிருந்து தப்பிச்சென்றனர்.

இன்று காலை ஊழியர்கள் எழுந்து பார்த்தபோதுதான் கொள்ளை நடந்திருப்பதை உணர்ந்தனர். பின்னர் இது குறித்து அவர்கள் அறந்தாங்கி போலீசில் புகார் கொடுத்தனர். அதன்பேரில் விரைந்து வந்த போலீசார் வழக்குப்பதிவு செய்து கொள்ளையர்களை தேடி வருகிறார்கள்.

மேலும் பெட்ரோல் பங்கில் வைக்கப்பட்டுள்ள சி.சி.டி.வி. காமிராவில் பதிவான காட்சிகளை கொண்டு விசாரணையை தொடங்கியுள்ளனர். கைரேகை நிபுணர்களும் வந்து கொள்ளையர்களின் கைரேகைகளை பதிவு செய்தனர்.

இதேபோல் அறந்தாங்கி அருகே ஆவணத்தான் கோட்டை கிராமத்தில் உச்சி மாகாளி அம்மன் கோவில் அமைந்துள்ளது. நள்ளிரவில் இந்த பகுதியில் மர்ம நபர் ஒருவரின் நடமாட்டம் இருப்பதை மக்கள் உணர்ந்தனர்.

உடனே உஷாரடைந்த அவர்கள் திரண்டு சென்று பார்த்தனர். அப்போது அங்கு விழுப்புரம் மாவட்டம் அரசூரை சேர்ந்த வெங்கடேசன் என்பவர் நின்று கொண்டிருந்தார். அவரை விசாரித்தபோது மது போதையில் இருந்தார். மேலும் முன்னுக்குப்பின் முரணான தகவல்களை கூறினார்.

அதே சமயம் கோவிலில் சென்று பார்த்தபோது அங்கு, உண்டியல் உடைக்கப்பட்டு திறந்து கிடந்தது. உடனே இதுபற்றி பொதுமக்கள் போலீசாருக்கு தகவல் கொடுத்தனர். அதன்பேரில் அங்கு வந்த அறந்தாங்கி போலீசார் உண்டியலை உடைத்து பணத்தை திருடிய வெங்கடேசனை கைது செய்தனர்.

மேலும் அதே பகுதியில் நடந்த பெட்ரோல் பங்க் கொள்ளையிலும் வெங்கடேசனுக்கு தொடர்பு உள்ளதா? என்ற கோணத்திலும் போலீசார் விசாரணை நடத்தி வருகிறார்கள். ஒரே பகுதியில் அடுத்தடுத்து நடந்த இந்த கொள்ளை சம்பவம் அப்பகுதியில் பெரும் பரபரப்பை ஏற்படுத்தியது.

புதுச்சேரி:

புதுவை முத்தியால் பேட்டை பகுதியை சேர்ந்தவர் சதீஷ். இவர் புதுவை அண்ணா சாலையில் செல்போன் கடை நடத்தி வருகிறார். நேற்று இரவு ஊழியர்கள் கடையை பூட்டி விட்டு வீட்டுக்கு சென்று விட்டனர். இன்று காலை சதீஷ் வழக்கம் போல் கடையை திறந்து உள்ளே சென்றார். அப்போது அங்கிருந்த பொருட்கள் சிதறிக் கிடந்தன. மேலும் அங்கு வைக்கப்பட்டு இருந்த ரூ. 1 லட்சம் மதிப்புள்ள 10 செல்போன்கள் திருடப்பட்டு இருந்தது.

இது குறித்து சதீஷ் பெரியகடை போலீஸ் நிலையத்தில் புகார் செய்தார். இன்ஸ்பெக்டர் செந்தில்குமார் மற்றும் சப்-இன்ஸ்பெக்டர் முருகன் ஆகியோர் நேரில் சென்று விசாரணை நடத்தினர்.

மேலும் இந்த கொள்ளையில் துப்பு துலக்க கைரேகை நிபுணர்கள் சென்று கைரேகைகளை பதிவு செய்தனர்.

செல்போன் கடையில் புகுந்து கொள்ளையடித்த மர்ம நபர்களை போலீசார் தேடி வருகின்றனர்.

போரூர்:

சாலிகிராமம் மதியழகன் நகர் கே.கே. சாலையை சேர்ந்தவர் ஜெயகுமாரி (வயது40). இவர் தனது மகள் பிருந்தாவின் திருமணத்திற்காக நகை வாங்க ரூ. 40 ஆயிரம் பணம் மற்றும் வீட்டில் இருந்த 6 பவுன் நகைகளை எடுத்து கொண்டு அண்ணா நகரில் உள்ள நகைக் கடைக்கு மாநகர பஸ்சில் சென்று கொண்டிருந்தார்.

கோயம்பேடு 100அடி சாலை வந்தபோது நகை மற்றும் பணம் இருந்த பையை காணாமல் அதிர்ச்சி அடைந்து கூச்சலிட்டார்

கூட்ட நெரிசலை பயன் படுத்தி பஸ்சில் வந்த மர்ம நபர்கள் நகை-பணத்தை கொள்ளையடித்து சென்றது தெரியவந்தது. இதுகுறித்து ஜெயகுமாரி கோயம்பேடு பஸ் நிலைய போலீசில் புகார் அளித்தார்.

இதேபோல் பெருங்குடி கல்லுக்குட்டை அன்னை தெரசா தெருவைச் சேர்ந்தவர் நாகலட்சுமி (48). இவர் நேற்று நெற்குன்றத்தில் உள்ள தனது மகள் வீட்டிற்கு செல்வதற்காக கோயம்பேடு பஸ் நிலையம் வந்தார்.

பின்னர் நெற்குன்றம் செல்லும் மினி பஸ்சில் ஏறி அமர்ந்தார். பஸ் கிளம்பி சிறிது தூரம் சென்றதும் தனது கைப்பை கிழிந்து கிடந்ததை நாகலட்சுமி கண்டார்.

மர்ம நபர்கள் பையை கிழித்து அதிலிருந்த 5 பவுன் நகைகளை திருடி சென்றது தெரிந்தது. இது குறித்து கோயம்பேடு பஸ் நிலைய போலீசார் விசாரணை நடத்தி வருகின்றனர்.